बाँके, (नेपालगञ्ज माघ) १४-
बाँकेको राप्ती सोनारीमा हुनलागेको ७ औं राष्ट्रिय थारु साहित्य सम्मेलनको तयारी अन्तिम चरणमा पुगेको छ । थारु लेखक संघ नेपाल र थारु गोचाली समाज नेपाल बाँकेले शनिबार नेपालगन्जमा पत्रकार सम्मेलन गरी आगामी माघ २० देखि २२ गतेसम्म सञ्चालन हुने सम्मेलनको तयारी अन्तिम चरणमा पुगेको जानकारी दिएका हुन् । सम्मेलनकोलागि स्टेज, स्वागत गेट निर्माण, अतिथीहरुलाई निमन्त्रणा गर्ने काम लगभग अन्तिम चरणमा पुगेको थारु गोचाली समाज नेपालका महासचिव कालुराम समर्पणले जानकारी दिनुभयो । सम्मेलन उद्घाटकालागि हाल सम्म प्रधानमन्त्री पुष्प कमल दाहाल प्रचण्ड आउने तयारी रहेको र कुनै कारणबस आउन नसक्ने भएमा नेपाल सरकारका पर्यटन मन्त्रीलाई ल्याउने उहाँले बताउनुभयो । उहाँले सम्मेलन भब्य रुपमा सफल पार्न स्थानिय युवा, बरघर, सामुदायिक वन उपभोक्ता समुहलगायतले आ आफ्नो क्षेत्रबाट स्वस्फूर्त रुपमा सहयोग गरिरहेको बताउनुभयो । सम्मेलनमा पूर्व देखि पश्चिम नेपालबाट सहभागी हुन आउने पाहुनाहरुको स्वागतकालागि राप्ती सोनारीका विभिन्न ७ स्थानमा स्वागत गेट निर्माणको काम जारी रहेको महासचिव समर्पणले जानकारी दिनुभयो ।
थारु लेखक संघका केन्द्रीय सदस्य शेखर दहितले सम्मेलनमा समकालीन थारु साहित्यबारे विमर्श, विभिन्न रचना वाचन, थारु भाषाको पुस्तकको प्रदर्शनी र बिक्री गरिनुका साथै थारु साहित्यको अनुसन्धान, राप्ती सोनारीको विकासकालागि प्राथमिकताहरु, आदिवासी भाषा दशक र बाँकेको मातृभाषा, विकासमा वरघरको भुमिका, पश्चिम थरुहटमा राजनीतिक फिलिंगो, होमस्टेमा थारु समुदायः उद्यमशिलता सम्भाब्यता, आख्यानमा थारु , बाँकेमा थारु साहित्यको अवस्था, थारु साहित्यमा युवा लगायतका विषयमा छलफल हुने बताउनुभयो ।
त्यसैगरी सिकलसेल एनिमियाको कहर ः जनस्वास्थ्यमा प्रतिकुल असरबारे पनि छलफल हुनेछ । थारु समुदायको कला संस्कृतिको खोज अनुसन्धान तथा ईतिहाँस बारे दस्तावेजीकरण गर्ने उद्देश्यले थारु लेखक संघले प्रत्येक बर्ष राष्ट्रिय सम्मेलनको आयोजना गर्दै आएको केन्द्रय सदस्य दहितले बताउनुभयो । देशभरीबाट आएका झन्डै तीन सय लेखक, पत्रकार, विश्लेषक, अध्येताहरूलाई बाँकेको राप्तीसोनारी र नरैनापुरमा रहेका पर्यटकीय क्षेत्र बर्फानीबाबा, सन्तानेश्वर, भुवरभवानी, सिक्टा नहर मूल बाँध क्षेत्रको अवलोकन गराउने कार्यक्रम पनि रहेको आयोजकले जनाएको छ । पत्रकार सम्मेलनको सहजीकरण जंग्रार साहित्यक बखेरीका केन्द्रय अध्यक्ष सोम डेमन्डौराले गर्नुभएको थियो ।
यसअघि ०७३ सालमा पहिलो राष्ट्रिय थारु साहित्य सम्मेलन दाङमा भएको थियो । दोस्रो कैलालीको पटेलामा, तेस्रो बर्दियाको बढैयातालमा, चौथो रुपन्देहीको मुर्गीया, पाँचौं सुर्खेतको नयाँगाउँ, छैठौं कञ्चनपुर र सातौं बाँकेको राप्तीसोनारी गाउँपालिका–६ सिधनवामा हुन लागेको हो ।
